ІІМ-нің басшысы Нұрсұлтан Назарбаевқа тәртіп сақшылары қызмет барысында киетін киім үлгілерінің соңғы нұсқасын көрсетті, — деп хабарлайды «Хабар 24». Президенттің баспасөз қызметі ұсынған бейнежазбаның кадрларынан салтанатты шараларда киетін қиімнің қандай болатыны анық байқалмайды.
Есесіне, күнделікті киімнің арқа жағында Politsiia деген жазудың бары айқын көрініп тұр. Министрдің сөзінше, бұл киім үлгісі ыңғайлы әрі заманға сай болмақ. Бейнежазбаға көз жүгіртсек, тәртіп сақшылары ауа райына байланысты кепкі, тоқылған бас киімдер мен құлақшындар киетін көрінеді. Жол полициясының қызметкерлері киетін киім үлгілері жарық шағылыстыратын элементтермен жабдықталады. Сонымен қатар, полиция жетоны да латын тіліндегі жазулары бар ақ-қара түсті болып өзгереді екен.
ІІМ тәртіп сақшыларының киім үлгісі құқық қорғау органдарын реформалау шаралары аясында жүзеге асатынын мәлімдеген болатын.
21.11.2018 жылы. сағ. 16:00-де толықтырылды:
Бұрында тәртіп сақшыларының 2019 жылдың 1 қаңтарынан бастап киім үлгісін ауыстыратыны жайлы айтылған болатын. Алайда, Ішкі істер органдарын жаңғырту бойынша жол картасының жобасына сәйкес киім ауыстырудың мерзімі сәл өзгешелеу. Құжатта полиция формасының ребрендингі таяу екі жылда өтеді деп қарастырылған. Оның үстіне, 2019 жылдың алғашқы жарты жылдығында ІІМ жаңа форманың үлгілерін жан-жақты зерделеп, бұйрықтарға өзгерістер енгізеді және конкурс арқылы отандық дизайнерлер мен тігіншілерді таңдайтын болады. Тек 2020-2021 жылдары ғана ІІО-ның қызметкерлерін жаңа киім үлгісімен қамтамасыз ету кезең-кезеңімен жүргізіле бастайды.
Сөз орайы келгенде айта кететін жәйт, дәл осы Жол картасы бағдарламасымен 2019 жылдың алғашқы тоқсанында жол-патрульдік полицияның саптық бөлімшелерін патрульдік полицияға ауыстыру қарастырылған.
Комментариев: 0