Калифорниядағы Drako компаниясы бес метрлік Dragon кроссоверін жұрт назарына ұсынды. Фирма жаңа өнімін премиум-сегменттегі ең қуатты, қарқынды және жылдам кроссовер деп атады. Бағасы — 290 000 доллар.
Экстерьерін жасаған Луи Вермеерш алдына ірі антиқанат, арт жағына екі шағын спойлер орнату арқылы ерекше пішін берген. Жоғары қарай ашылатын екі есігі барлық орындыққа оңай отыруға мүмкіндік береді. Көліктің айрықша пошымын 23 дюймдік дөңгелек дискісі толықтырып тұр.
Dragon салонында жеті экран бар. Екеуі аспаптар панелі мен медиажүйе дисплейі қызметін атқарады, сонымен қатар артқы камера жұмысын істейтін экрандар бар. Жоба авторлары арттағы жолаушыларды да ұмытпапты, салон ішіндегі айна мониторға айналады. Ең ірі экран ортада орналасқан, оның диагоналі — 17.1 дюйм.
Drako Dragon карбон монококқа негізделеді. Компания бұл шешім шассиді екі есе жеңілдетіп, қаттылығын әдеттегі премиум кроссовермен салыстырғанда екі есе арттыруға мүмкіндік беріпті. Бірақ ірі күштік құрылым тұрғандықтан, машина 2254 келі тартады.
Төрт моторлы күштік құрылым 2000 ат күшін береді. Мамандардың есебі бойынша бұл көліктің 1.9 секундта 60 миль (96 км/сағ) жылдамдық алуына жағдай жасайды. Ал ең жоғары жылдамдығы — 320 км/сағ. Бұл Dragon-ды жер шарындағы ең жылдам кроссовер атауға негіз болатын дерек. Қазір 320 км/сағ көрсеткішпен бензинді Aston Martin DBX707 көш басында тұр. Tesla Model X-тің жылдамдығы — 262 км/сағ, Lotus Eletre R 265 шақырым жылдам жүре алады.
Гиперкроссоверге тапсырыс қабылданып жатыр, бірақ клиенттерге жеткізу 2026 жылдан ерте басталмайды. Жоспар бойынша Drako жылына 5000 көлік сатады.
Комментариев: 0