1999 жылы Mitsubishi Lancer Evolution VI өндірісі басталар алдында Ralliart тест-драйв үшін жеті прототип жасаған. Солардың бірі Ұлыбританияда сатылымға шықты. Бәссауда 16 мамырда өтеді.
Evolution VI прототиптері санаулы болуымен ғана емес, тарихымен де ерекшеленеді. Жапония билігі Mitsubishi-ге тіркелмеген көліктерді тек екі аптаға жолға шығаруға рұқсат беріп, кейін ел аумағында сатуға тыйым салған. Сынақтан өткен соң төрт Evo компанияға оралып, раллиге қатысатын болидтерге негіз болды. Біреуі қолды болған, содан бері еш хабар жоқ. Ал қалғанын таныстарына таратқан компания өкілдері бірден елден шығаруды талап етіпті.
Біз сөз етіп отырған көлік Ұлыбританияға 1999 жылы жеткен және екі адамның меншігінде болған. Алғашқы иесі досына сатып, 2012 жылы қайта алған екен. Қазір Evo VI одометрі 84 мың миль көрсетіп тұр.
Осы уақытқа дейін магнитоласы ғана ауысқан, көрсетілген қызмет тарихы құжатында бар. Хабарландыру авторы кем-кетігін де жасырмай, шанағының артқы бөлігінде тот басқан жер барын жазыпты.
Комментариев: 0