Неміс тюнерлері спортбайктан квадроцикл жасайды

Германияның Exeet Quads компаниясы суперквадроцикл деп атауға болатын ерекше көлік ұсынды. Инженерлер оны жасау үшін қазіргі ең жылдам әрі қуатты спортбайктарға тағы бір жұп дөңгелек қосады.

Жоба Швейцариядағы GG Motorrad жұмысы сияқты ауқымды емес. Бірақ Exeet Quads өнімі жалпыға ортақ жолда жүре алады әрі компания екі жылға кепілдік береді.

Конверсия компания әзірлеген RockShox тірегі бар алдыңғы аспа мен 200 ат күшіне ие (133 Нм) жаңа артқы оське негізделген. Тюнерлер квадроцикл дөңгелегін әу бастағы спортбайк параметріне қарап таңдайды. Мысалы, 200 ат күшіне ие 999 кубтық мотормен жүретін Kawasaki H2-ге негізделген Blackbull H2 моделінің алдыңғы жағына 8 дюймді, арт жағына 10 дюймді дискі орнатады. Олардың ені 10 дюйм болады.

Квадроцикл H2-ге ғана емес, BMW S1000RR сияқты өзге спортбайктарға немесе 105 күшке ие BMW F900R секілді қарапайым техникаларға да негізделеді. Сондай-ақ клиент өтінішіне қарай суперквадты Öhlins амортизаторы, арнайы орындық және басқа да аксессуармен жабдықтауға болады.

Exeet Quads бағаны тапсырысқа сай белгілейді, бірақ өнімдері арзан болмайтыны анық. Германияда Kawasaki H2 негізіндегі квадроциклдер 41 мың еуро, ал жаңа BMW M1000RR негізіндегі техника 60 мың еуро тұрады.