Қар басып, аяз қысты. Қазақстан жолдарында жағдай қалай

Қазақстанның басым бөлігінде қолайсыз ауа райы төртінші күн жалғасып келеді, кей аймақта төтенше жағдай жарияланды. Еліміздің 12 облысында халықаралық, республикалық және жергілікті маңызы бар жолдардың 100-ден астамы жабылды. Қазір 500-ден аса жылыту пункті жұмыс істеп тұр.

Патрульдік полиция қатаң режимде қызметін атқарып жатыр. Полиция телеграм-каналда қар басқан жолдардың видеосын жариялады.

Мамандар желтоқсанның 10-13-і аралығында жабық жолда 1100 жүргізушіге көмек көрсетті. Жылыту пунктіне 1012 адамды, оның ішінде 25 баланы жеткізді. Ешқандай ауыр оқиға тіркелмеді, зардап шеккендер жоқ.

«ҚазАвтоЖол» мен патрульдік полицияның ескертуіне қарамастан жолға шыққан жүргізушілер полиция мен құтқарушылардың көмегімен ғана тірі қалуға болатын жағдайға тап болады.

«Ауа райының күрт өзгеруіне, екпінді жел мен көктайғаққа байланысты полицейлер Қазақстан тұрғындары мен қонақтарын аса қажет болмаса, алыс жолға шықпауға шақырады! Жол ережелерін сақтап, өзіңіздің және өзгелердің өміріне қауіп төндіретін әрекеттерден аулақ болуды сұраймыз», — деп үндеу жасады Ішкі істер министрлігі.

Полицейлер Әкімшілік кодекстің 667-бабына сәйкес, жүргізуші қолайсыз ауа райында жолдардың жабылатыны туралы ресми ескертуге қарамастан жолға шығуға шешім қабылдаса, кем дегенде айыппұл төлейтінін және ісі сотта қаралатынын, тіпті 15 тәулікке қамалатынын еске салды.

Kolesa.kz редакциясы бір мақаласында жолда қарлы боран соғып, жолдан адасып қалсаңыз не істеу керегі туралы жазған болатын. Оны сақтап алып, басқа көлік иелеріне жіберіңіз.