Жүргізушілер үшін 2021 жыл қандай болатыны жайлы сөз қозғауға әлі ерте, жыл енді басталды. Дегенмен биыл автосалонда пайда болатын жаңа көліктер жайлы баяндаймыз.
4-сериялы BMW
2021 жылғы I тоқсан
Биыл ел жолдарында танауы ірі төртінші сериялы купе жүйткиді. Марканың ресми дилері екі түрленімнің бағасын жариялады. Қарапайым 420i — 18.5 млн теңге, анағұрлым қуатты 430i 20.7 млн теңге тұрады. M440i xDrive-ты тапсырыспен әкеледі.
Cadillac Escalade
Қазір Қазақстанда төртінші буындағы Cadillac Escalade сатылып жатыр. Оның бағасы 37.5 млн теңгеден басталады. 2021 жылы бізге тәуелсіз аспа орнатылған, Magnetic Ride Control жүйесі мен экраны 14.2 дюймдік аспаптар панелі бар бесінші буын өкілі келеді.
Chevrolet Equinox
Қазақстанда Equinox сату жоспары барын ешкім ресми жариялаған жоқ, алайда Chevrolet құрастырылатын модельдерін біртіндеп көбейтіп келеді. Келесі жылы топтама аталған кроссовермен толығуы мүмкін.
Chevrolet Tahoe
Өткен жылдың соңына қарай елде Қостанайда құрастырылған Chevrolet Tahoe сатыла бастады. Алайда қазір зауыт модельдің алдыңғы нұсқасын шығарып жатыр. Жаңа буыны былтыр АҚШ-та сатылымға шықты, жуырда бізге де жететін шығар. Жаңа көлікке тән ерекшеліктің бірі — тәуелсіз артқы аспасы.
Hyundai Creta
2021 жылғы III тоқсан
ЕЭО нарығына арналған екінші буындағы Hyundai Creta 2021 жылы жазда таныстырылады. Ресей тұрғындары Питерде жасалған миашинаны маусымда, ал біз Алматыдағы зауыттан шыққан көлікті жылдың екінші жартысында аламыз.
Hyundai Santa Fe
2021 жылғы I тоқсан
Hyundai Santa Fe-нің екінші буыны былтыр маусымда көпке көрсетілді, ал жыл соңында марка өкілі оның бағасын жариялады. Қарапайым нұсқасын 13.8 млн теңгеге сатып алуға болады.
Hyundai Tucson
2021 жылғы III-IV тоқсан
Hyundai компаниясының күз басында таныстырылған үшінші жаңа өнімі — Tucson. Жол талғамайтын көліктің біздің елге қашан келетіні белгісіз, бірақ Қазақстан жолдарында 2021 жылы жүйткиді деген болжам бар. Бізге 1.6 литрлік турбомоторы бар нұсқасы мен гибрид күтудің қажеті жоқ, елге 6 сатылы автоматпен жұмыс істейтін 2 литрлік атмосфералы моторы бар машина жетеді.
JAC S3
2021 жылғы I тоқсан
2021 жылдың алғашқы тоқсанында автосалондарда алдыңғы оптикасы жіңішке, бамперінде ірі ауа тартқышы бар JAC S3 пайда болады. Кроссовердің бірнеше данасы Қостанайдағы зауытта 2020 жылғы күзде құрастырылған, солардың бірі зауыттан шыққан 100 мыңыншы автокөлік атанды. Бағасы белгісіз, қазір сатылып жатқан 1.6 литрлік моторы бар механикалық нұсқасы 5.5 млн теңге тұрады, ал вариаторы бар көлікті 6.3 млн теңгеге аласыз.
JAC S7
2021 жылғы I тоқсан
2020 жыл аяқталуға жақын қалғанда JAC 175 ат күшіне ие 1.5 литрлік турбомотор орнатылған S7 кроссоверінің бағасын жариялады. Қостанайда жасалатын көліктің ең қарапайым нұсқасы 9.5 млн теңге тұрса, қымбат жиынтығы 10.3 млн теңгеге бағаланады.
Kia Sorento
2021 жылғы I тоқсан
Төртінші буындағы Kia Sorento былтыр көктемде таныстырылды. Күзде 2.2 литрлік дизельді моторы бар және 2.5 литрлік бензинді моторы бар нұсқалары Ресейге жетті. Біздің елге дизель келмейді, ал бензинді моторы бар көлік биыл келуі тиіс.
Lada Niva Travel
2021 жылғы I-II тоқсан
2021 жылы АВТОВАЗ да жаңа көліктер шығарады. Chevrolet Niva-ның орнын атауында Travel қосымшасы бар Lada Niva басады. Алдыңғысынан тек сырттай ерекшеленетін жаңа көлік Қазақстанда шығарыла ма деген сұраққа жауап әлі берілмеді.
Lada Largus
2021 жылғы I-II тоқсан
Жаңарған Largus X-стилінде жасалған, оптикасын Renault-дан алыпты. Техникалық жағынан еш өзгеріс жоқ. Егер Өскемендегі жағдай оңалмаса, біздің елге «ларгустар» Тольяттиден келетін болады.
Lexus LX
2021 жылғы III тоқсан
Lexus LX-тің жаңа буыны жайлы ақпарат аз. Дегенмен премиум санатындағы модель 2021 жылы жарық көреді деп күтілуде, бірнеше ай өткен соң машина Қазақстанға келуі мүмкін.
Mercedes-Benz S-Class (W223)
2021 жылғы I тоқсан
W223 индексіндегі S-Class-тың алғашқы бір-екі данасы біздің елге өткен жылдың соңына қарай келген, бірақ оны жекелеген адамдар жеткізді. Ал ресми түрде клиенттер S-Class-ты келесі жылдың алғашқы жартысында алады. Көліктің анағұрлым «қарапайым» нұсқасы 58.9 млн теңге тұрады.
Mitsubishi Outlander
2021 жылғы IV тоқсан
Төртінші буындағы жаңа Mitsubishi Outlander әлі ресми таныстырылған жоқ, бірақ біз оның түрін көрдік және оны 2021 жылы сатып алуға болатынына сенімдіміз. Тапсырыс беру жыл соңына қарай басталатын шығар. Бұл Mitsubishi CMF-С/D платформасына негізделеді, ал капот астына 183 ат күшін беретін 2.5 литрлік атмосфералы мотор орнатылады.
Mitsubishi Pajero Sport
2021 жылғы I-II тоқсан
Жаңа Pajero Sport 2019 жылы жазда таныстырылған. Біздің жолдарда 2020 жылдың соңына қарай жүйткиді деп күтілген еді, бірақ бұл мүмкін болмады. Қолда бар деректерге сүйенсек, жол талғамайтын көлік автосалондарда 2021 жылы көктемде пайда болады.
Nissan X-Trail
2021 жылғы IV тоқсан
Nissan X-Trail де әлі ресми таныстырылмады. Машина 2021 жылы көрсетіледі деген болжам бар. Сол жылы Ресейге жеткізіледі, демек Қазақстанға келетін күн де алыс емес.
Renault Duster
2021 жылғы II-III тоқсан
Екінші буындағы Renault Duster-дің ЕЭО нарығына жетуіне бірнеше жыл кетті. 2017 жылы Dacia маркасымен жарық көрген кроссовер Қазақстанда 2021 жылы сатыла бастайды. Модель 1.3 литрлік турбомотормен ұсынылады, ол тек вариатормен жұмыс істейді.
Škoda Rapid
2021 жылғы I тоқсан
Škoda Rapid қаңтарда сатылымға шығады. Қазақстанда тапсырыс қабылдау өткен жылдың аяғында басталды. Бағасы 6 млн теңгеден басталады, ал 6 сатылы автоматпен жұмыс істейтін 1.6 литрлік моторы бар Style нұсқасын 8.3 млн теңгеге аласыз.
Toyota Camry 70 FL
2021 жылғы III-IV тоқсан
Питердегі зауыттан шығатын Toyota Camry рестайлингі жайлы еш хабар жоқ, бірақ ол 2021 жылы жарық көреді деген сыбыс бар. Машина еуропалық гибрид седан сияқты жаңарады. Яғни, сырттай өзгеріс көп емес, салонына Apple CarPlay мен Android Auto қосылатын 9 дюймдік планшеті бар мультимедиа жүйесі орнатылады.Техникалық жағы да өзгеріссіз қалады.
Toyota Land Cruiser 300
2021 жылғы III тоқсан
Toyota Land Cruiser 300-дің әлемдік деңгейдегі таныстырылымы келер жылғы көктемге жоспарланған, жылдың екінші жартысында қазақстандық клиенттер де міне алады. Жол талғамайтын көлік жайлы мәлімет жоқтың қасы. Себебі оған қатысты ақпараттың ешқайсысы ресми расталмады.
Volkswagen Tiguan
2021 жылғы I тоқсан
2020 жылдың орта тұсында Volkswagen компаниясы Tiguan-ның жаңарған нұсқасын көрсетті. Кроссоверді өзге шамдары мен бамперінен және ірі радиатор торынан танисыз. Өткен жылдың соңында көліктің бағасы (13.2 млн теңгеден басталады) белгілі болды. Машина 2021 жылдың басында сатылымға шығады.
Комментариев: 0