Қытайдың тағы бір бренді Қазақстан нарығына келді. Ол — BYD-ге кіретін Denza. Концерннің Қазақстандағы дистрибуция директоры Антон Кущ марканың елге келетінін 2026 жылдың басында хабарлаған.
Denza-ның алғашқы моделі — өз елінде Leopard 8 деп аталатын B8. Ұзындығы 5.2 метр, дөңгелек базасы 2.92 метр болатын рамалы автомобиль параллель гибрид күштік құрылыммен жабдықталған. Оған 194 ат күшін (350 Нм) беретін 2 литрлік турбомотор мен екі электромотор кіреді. Жалпы қуаты — 603 ат күші. Электрлі агрегаттар 36.8 кВт·сағ аккумулятордан қуат алады. Батареяны қуаттамай 115 шақырым еңсеруге болады. 3.3 тонналық B8-дің жүріс қоры NEDC циклі бойынша 1040 шақырымға, WLTP бойынша 825 шақырымға жетеді. Жанармай багының көлемі — 91.5 литр.
Экспортқа арналған модификацияда клиренсті 220-дан 330 мм-ге көтере алатын DiSus-P интеллектуал гидравликалық аспасы, соның ішінде жолсыз жерге арналған электронды көмекшілердің жинағы және артқы әрі алдыңғы дифференциалды бұғаттау жүйесі бар. Бірақ екіншісі тек ең қымбатында болады.
Denza B8-дің Flagship деп аталатын бір комплектациясы саудаға шығады, бірақ екі түрлі салон конфигурациясымен және жабдықтарымен ерекшеленеді. Арзанырақ 7 орынды түрленім 13 қауіпсіздік жастығы, жүргізуші ассистенттерінің жинағы, айнала шолу камерасы, панорамалы шатыр, үш аймақты климат-бақылау, алдыңғы және артқы орындықтарды жылытқыш пен желдеткіш, артқы әйнек пен айналарды жылытқыш, 17.3 дюймдік экраны бар мультимедиа, жүргізуші мен алдыңғы жолаушыға арналған 12.3 дюймдік экрандар, 18 динамикті аудиожүйе, сымсыз қуаттағыш, алдыңғы қатардағы орындықтардағы массаж функциясы, тоңазытқыш және басқа жабдықтар алады. Мұндай B8-дің бағасы — 34 990 000 теңге.
Екінші қатарда бөлек орындықтары бар 6 орынды B8 35 990 000 теңге тұрады. Ол артқы көрініс айнасына кіріккенкамера, проекциялық дисплей, артқы жолаушыларға арналған массаж функциясы, электр көмегімен реттелетін алдыңғы орындықтар және алдыңғы дифференциалды бұғаттау жүйесімен жабдықталады.
Denza өкілдері B8-ді Қазақстан нарығына бейімдеу кезінде мультимедиа жүйесі мен дауысты көмекшіге қазақ және орыс тілін қосқанын атап өтті. Фирмалық Denza мобильді қосымшасын да пайдалануға болады.
Комментариев: 0