Ресей L-Type микромобилін шығарады

«Алмаз-Антей» концерніне кіретін компаниялардың бірі айналысып жатқан L-Type микромобиль прототипінің суреттері жарияланды. Екі орынды автомобиль Ресей автоөндірісіндегі ең арзан электрокар атануы мүмкін. Қашан шығатыны әзірге белгісіз.

L-Type-тың алғашқы көріністік үлгісі Беларусьтегі Unimo фирмасының зауытында жасалғанын «Автопоток» телеграм-каналы хабарлады. Брендтің сайтында серіктестік жоба туралы айтылған, бірақ қазір сипаттамасы бар беті жоқ.

Компания мамандары жаңа үлгіні көрсеткен болатын, ал белорустар түсірген суреттерден интерьерін көруге болады. Салон элементтері қатты пластиктен жасалуы мүмкін және шағын дисплей, үш батырма орны мен сөре рөлін атқаратын алдыңғы панель орнатылған. Желдеткіш дефлекторы және климат-бақылау блогы әзірге жоқ.

Орындықтардың жастықшасы жұқа, арқасы жалпақ. Кейбіреулер бұл дайын өнімнің құнын арзандату десе, басқалары серияға шығатын модельде жайлы орындықтар болады дейді.

Электрокардың жоспарланған өлшемдері — 2.5×1.5×1.5 метр, жүріс қоры — 180 шақырым. Инженерлердің ойынша мұндай көлікке жеткізу қызметінде, автомобиль жалға алу сервисінде, аумағы үлкен өндірістің ішінде сұраныс жоғары болады. Машинаның жолаушы орындығын алып тастап, фургонға айналатын коммерциялық нұсқасы да болуы мүмкін. Ауыр квадрицикл саналатын осындай электрокарды Еуропада Citroen, Opel және Fiat шығарады.

Бренд L-Type-ты 2024 жылдың аяғына таман құрастыра бастайды. Өндіріс үшін Санкт-Петербургтегі зауытты іске қоспақшы еді, дегенмен қазіргі суреттерден прототипті серияға шығару үшін ұзақ уақыт керек екені көрініп тұр.