V8 моторы бар соңғы Jeep Wrangler

Jeep соңғы Wrangler Rubicon 392 Final Edition туралы ақпарат берді. Компания 3300-ін АҚШ-та қалдырып, Канадаға 300, басқа елдерге бар болғаны 100 машина жіберуді жоспарлап отыр.

Final Edition-ның ең төменгі бағасы жүз мың доллардан асады, жеткізуді қосқанда 101 890 доллар. Мұндай бағаға клиент 8 сатылы автомат қорап пен 2 сатылы үлестіргішпен үйлесетін 6.4 литрлік V8 Hemi (470 ат күшін және 637 Нм момент береді) моторы бар экстремал туризмге дайындалған жол талғамайтын көлік алады. Бұл қозғалтқышпен машина алғашқы жүздікті 4.5 секундта еңсереді.

Rubicon 392-мен салыстырғанда соңғы модельдің аспасы көтерілген, соның арқасында клиренс 295 мм-ге жетті. Стандарт жабдықтар тізіміне табалдырықты қорғау, қалқан (кенгурятник) және тарту күші 3.6 тонна болатын шығыр кіреді. 17 дюймдік дөңгелектер 35 дюймдік BFGoodrich All-Terrain шинасымен қапталған.

Салоны алтын түстес ендірмелері бар қара Nappa былғарысымен қапталған, алдыңғы орындықты жылыту және 12 бағытта электрлі реттеу, рөлді жылыту функциясы, алдыңғы камерасы болады. Базалық жабдықтар тізіміне 83 заттан тұратын саймандар жинағы және жиналмалы үстел кіреді.

Бренд Wrangler Rubicon 392 Final Edition моделіне тапсырыс қабылдай бастады, бірақ көлік саны аз болғандықтан, ол ұзаққа созылмайды.