Zeekr 009-дың төрт орынды нұсқасы шығады

Zeekr Guanghui деген атаумен 009 минивэнінің жаңа түрленімін таныстырды. Guanghui-да артқы жолаушыларға арналған екі-ақ орын болады. Мұндай 009 минивэннің арнайы нұсқасы ғана емес, жеке модель болады. Оның тұсаукесері 19 сәуірде өтеді.

Жаңа өнімнің алғашқы суреті жарияланды. Суреттен 009 бен Guanghui-дің сырт пішінінде айырмашылық аз екенін байқауға болады. Ал салонның жолаушылар бөлігі толықтай өзгереді.

Артқы жақта екі жеке кресло орналасқан, оларда желдету және массаж функциясы болады. Ортаңғы консольде қосымша функцияларды басқаратын сенсорлы панель тұр, ал жолаушы мен жүргізуші арасындағы алып экран медиажүйеге жауап береді. Сондай-ақ көптеген динамик көзге түседі, олардың кейбірі креслоның бас тірегішінде орналасқан.

009 Қытайда 6 орынды және 544 ат күшіне ие екі моторлы нұсқада ғана сатылады. Ал онымен бір платформаны бөлісетін Volvo EM90-ның моно жетекті түрленімі бар. Машина 500 000–588 000 юань (30.8–36.3 млн теңге) тұрады, ал Guanghui бұдан айтарлықтай қымбат болады.