Биыл шілдеде Kia жаңарған Sorento-ның бірнеше суретін жариялаған, бірақ ол кезде рестайлинг туралы ешбір ақпарат бермеді. Енді бренд кроссоверді ресми таныстырып отыр, машинаның сырт пішіні Kia EV9 бен Telluride-ті еске салады, автомобиль бірқатар жаңа функциямен толықты, сондай-ақ атмосфералы мотормен қоштасуы мүмкін.
Бұған дейін желіде тараған салон суретінен Sorento-ның алдыңғы панелінде бөлек дисплей емес, ойыс планшет тұрғанын көрген едік. Кластер 12.3 дюймдік цифрлы аспаптар панелі мен жаңа медиажүйе экранын қамтиды. Sorento-ның қымбат түрленімінде 10 дюймдік проекциялы дисплей болады.
Сондай-ақ машинада жаңа әрі шағын климат басқару пульті, саусақ ізін танитын сканер, алдыңғы және артқы жақты түсіретін камерасы бар бейнетіркеуіш, цифрлы артқы көрініс айнасы және смартфонды кілт ретінде пайдалану мүмкіндігі бар.
Модельдің мотор гаммасында 2.2 литрлік турбодизель (194 ат күші), 2.5 литрлік бензинді турбомотор (281 ат күші) және 1.6 литрлік қозғалтқыш (180 ат күші) пен электромотордан (60 ат күші) тұратын гибрид күштік құрылым бар. Kia бұл тізімге Sorento-ның бұрынғы 2.5 литрлік атмосфералы моторын қоспапты. Ол топтамадан алына ма, белгісіз. Марка қазір Корея нарығына арналған агрегаттарды ғана жариялаған болуы мүмкін, экспортқа шығатын модельдің сипаттамасы кейін белгілі болады.
Оңтүстік Кореяда жаңарған Kia Sorento жақында сатыла бастайды, ал шетел нарығына биыл жыл аяғына дейін шығады.
Комментариев: 0