Жол сапасына жауапты 50 мың шенеунік жазаланды

Орталық коммуникациялар қызметінің брифингінде Әкімшілік полиция комитетінің төрағасы Қайсар Сұлтанбаев 2024 жылдың 4 айы мен 20 күнінде қала сыртындағы жолдарда 500-ден астам адам қаза тапқанын айтты. Жеті мыңнан астам адам жарақат алыпты.

Жыл сайын өлімге әкелетін жол апаты көп болатын жолдар Алматы, Жамбыл және Қарағанды облыстарының аумағында. Апаттың басты себебі — жылдамдық асыру, бірақ жол жағдайы да қауіпсіздік мәселесінде маңызды рөл атқарады. Қазақстандағы жолдардың басым бөлігі ескі стандартқа сай салынған. Ол — екінші және үшінші категориядағы ені 7 метрден аспайтын екі жолақты жолдар. Ал бірінші санаттағы, төрт және одан да көп жолағы бар жолдар небәрі 2 % құрайды.

Қ. Сұлтанбаевтың айтуынша, заманауи трасса салу жол қауіпсіздігін жақсартуға көмектеседі.

«15 жыл бұрын жолда 4 мыңнан астам адам қаза тапса, қазір бұл көрсеткіш екі есе азайды. Жолдардың кейбір бөлігінде өлім алты есе қысқарды. Мысалы, Астана — Щучинск трассасындағы жолақ саны алтыға дейін ұлғайып, бөлу жолағы пайда болғаннан кейін өлім саны жылына 75-тен 12 адамға азайды», — деді Әкімшілік полиция комитетінің басшысы.

Полиция мен әкімдік жол жағдайын жылда көктем мен күзде тексереді. Былтыр бүлінген жолдар мен сынған люк қақпақтары үшін 50 мыңнан астам шенеунік жазаланды. Қазір қала сыртындағы жолдарға 600-ден астам бағдаршам, 25 мың жол белгісін орнатып, 1 млн км-ден астам жол таңбасын жаңарту қажет.