Қайта жанданған Fiesta Renault-ның платформасына негізделеді

Кейінгі жылдары Ford-тың Еуропадағы жағдайы мәз емес. Компания өндіріс көлемін қысқартып, кезінде әйгілі болған модельдерден бас тартып жатыр. Оған қарт құрлықтағы Қытай көліктерінің танымалдығы да әсер етті. Ford қол қусырып отырған жоқ, компания жағдайды өзгертетін жоспар әзірлеп қана қоймай, оны жария етті. Бренд 2029 жылға дейін бес жаңа модель шығаруды жоспарлап отыр. Соның бірі — арзан әрі ықшам электромобиль.

Батареялы машина Fiesta деп аталады, бірақ бренд бұл ақпаратты ресми түрде растамады. Ford автомобильді жаңадан әзірлеп жатқан жоқ. Ол Renault-ның AmpR платформасына негізделеді. Француздар оны Renault 5 хетчін, ал Nissan маркасы Micra-ны жасағанда қолданды.

Екінші жаңа өнім — Puma Gen-e-дің орнын басатын және Renault 4-пен бәсекелесетін кроссовер. Ол да AmpR платформасын алады, оны француз автоконцерні өндіреді. Кейін топтамаға гибрид күштік құрылымы бар екі кроссовер қосылады.

Модельдер қатарына кіретін соңғы машина — Ford Bronco-ның еуропалық нұсқасы. Әзірге бұл автомобиль туралы мәлімет өте аз. Компания тек Bronco-ның сұлбасы бейнеленген суретті көрсетіп, көлік 2028 жылы Валенсиядағы зауыттың конвейеріне тұратынын хабарлады. Ол әртүрлі күштік құрылым алады және өзімен аттас рамалы модельге еш қатысы болмайды.