Ресейде автобөлшек тапшы

Кепілдік бойынша қызмет алуға барған жүргізушілер қиындыққа тап болғанын Gazeta.ru жазды. Volkswagen, Skoda мен Porsche, BMW, Mercedes-Benz, Ford, Jeep және Mazda маркалы машиналарға бөлшек табу қиындаған. Қолында фирмалық бөлшек қалмағандықтан, дилерлер ұсталған және көшірме компонент ұсынып жатыр.

Басылымға ақпарат берген мамандар «Фольксваген Груп Рус» қоймасында 1.4 және 1.6 литрлік моторға арналған май сүзгісі қалмағанын айтыпты. BMW X1 кроссоверіне мехатроник блогын, Mercedes-Benz CLA 250-ге автомат қораптың гидротрансформаторын алу мүмкін емес. GLE мен Еуропада құрастырылған VW модельдеріне қажет тежеуіш қалыбы да сатылмайды.

— Егер тізім жасайтын болсақ, бір күн жетпейді, — дейді дилерлік орталық қызметкері.

Әзірше Mitsubishi көліктеріне қызмет көрсетуде еш қиындық жоқ. «MMC Рус» ақпаратына сүйенсек, қоймада бар материал біраз уақытқа жетеді. Jaguar Land Rover бөлшек қоры 2.5 айдан кейін таусылатынын хабарлады. Kia, Hyundai және Nissan сатушылар қажет бөлшектің бәрі бар екенін айтты, бірақ оның қанша уақытқа жететіні белгісіз.

Ресейдегі қызмет көрсету орталықтары дубликат алуға мәжбүр. Мұндай жағдайда көлік иесі дилерді келісімшартты орындамағаны үшін сотқа беруге құқылы, алайда ресми сатушы қиын жағдайға тап болғандықтан осындай әрекетке барғанын негізге алып, ақтала алады.

Қазақстан нарығындағы жағдайды Kolesa.kz -тегі «Қосалқы бөлшектер» бөлімінен білуге болады.